Nasionaal – Die Onafhanklike Verkiesingskommissie (OVK) sê dit is “goed op dreef” met voorbereidings vir die plaaslike regeringsverkiesing wat waarskynlik in November 2026 sal plaasvind — presies vyf jaar ná die 2021-stemdatum.  

Hoewel die wet voorsiening maak dat munisipale verkiesings tot Februarie 2027 kan plaasvind, begin die verkiesingsratte reeds draai — en die sogenaamde “silly season” maak stadig maar seker sy opwagting. 

In ‘n aanbieding aan die Parlement se Portefeuljekomitee oor Binnelandse Sake op 24 Junie, het die OVK sy strategiese plan vir die huidige fiskale jaar uitgestippel. Sleutelpunte sluit in kieserregistrasiedae, toetslopies van stemprosedures en die beproewing van tegnologiese toerusting. Die beraamde koste van die verkiesing beloop minstens R2.7 miljard. 

OVK-hoofuitvoerende beampte, Sy Mamabolo, sê gereelde verifikasie-vergaderings is reeds in werking gestel om seker te maak dat die beplande mylpale bereik word: 

“Ek kan bevestig dat voorbereidings vir die 2026/27 plaaslike regeringsverkiesing goed aan die gang is.” 

Tog is een saak reeds duidelik: elektroniese stemme sal nié in 2026 gebruik word nie. Volgens die OVK word slegs die beleidsraamwerk vir moontlike toekomstige digitale deelname ondersoek. 

’n Ander fokusarea vir die kommissie is die rasionalisering van die land se politieke party-register. Tans bestaan dit uit dosyne geregistreerde partye wat nie aktief is of verkiesings wil betwis nie. Die OVK het bevestig dat dit hierdie entiteite wil begin afskryf om die politieke speelveld meer gefokus te maak. 

Die verkiesingsafkondiging mag nog ver wees, maar die voorbereidings is duidelik aan die gang — en met verkiesingskoors wat oor die volgende maande sal toeneem in intensiteit, is dit maar net die begin van die gebruiklike retoriek, veldtogte en strategiese bewegings wat die “silly season” so eie aan Suid-Afrikaanse politiek maak. 

Hou die Langeberg Bulletin dop vir plaaslike insigte, analise en gemeenskapsreaksie soos die 2026-stemstryd begin ontvou. 

Op plaaslike vlak dui eerste tekens aan dat die DA, ANC, VF+ en PA die partye is om dop te hou or die komende maande.